Tiltøk
Bygg eina broyting
Ein ráðstevna um hugsjónir og loysnir, ið tryggja eina burðardygga leið fyri bygging og planlegging
7. november 2024 kl. 13.00-16.00 á Hotel Føroyum
Byggivinnan er avgerandi fyri, hvat fyri samfelag vit ynskja at smíða til næstu ættarlið okkara. Samstundis er byggivinnan ein av høvuðsorsøkunum til, at vit ár um ár spreingja mørkini fyri, hvat heimur okkara orkar at geva. Vit sleppa ikki undan umhvørvisligu og sosialu avleiðingunum. Tó eru tað ofta stuttskygd búskaparlig sjónarmið, sum avgera, hvat og hvussu vit planleggja og byggja.
Um burðardygga skiftið skal eydnast, har atlit verður tikið til búskap, menniskju og umhvørvi, skal arbeiðast bæði strategiskt og pragmatiskt. Við øðrum orðum er neyðugt at seta í verk heildar- og langtíðarætlanir umframt nýggj burðardygg amboð og mannagongdir innan bygging og planlegging. Og hvussu gera vit so tað? Hvat krevur burðardygga skiftið av okkum, sum arbeiða innan økið, og hvørjar karmar tørvar okkum fyri at skapa veruligar broytingar? Hesar spurningar viðgera vit á eini ráðstevnu, ætlað tær, sum hevur áhuga í planlegging, bygging, burðardygd, flytiføri og infrakervi.
Tilmelding
Kostnaðurin er kr. 500. Tó er tað ókeypis fyri lesandi at luttaka. Freistin at tekna seg er 1. november.
Skrá
Framløga v/Vibeke Grupe
Virðið av tí vit byggja skal skiljast samfelagsbúskaparliga, umhvørvisliga og sosialt
- Frá stuttskygdum ‘kovboybúskapi’’ til langskygdan ’rúmdarmansbúskap’
Um Vibeke Grupe
Vibeke Grupe er arkitektur við serkunnleika innan nýskapan, broytingarleiðslu, gransking og menning umframt byggilistaliga sniðgeving við serstøkum denti á burðardygga skiftið. Hon hevur víðfevnandi royndir við at samstarva við øllum pørtum í virðisketuni innan bygging.
Vibeke hevur eina ph.d. í burðadyggum skifti (‘cirkulær omstilling’) av almenna bústaðarmarknaðinum við denti á sosiala, umhvørvisliga og búskaparliga virðiskapan við sniðgeving sum amboð. Hon arbeiðir sum høvuðsráðgevi hjá Danske Arkitektvirksomheder.
Framløga v/Malene Freudendal-Pedersen
Planlegging sum amboð til burðardygga menning
- Tá vit broyta karmarnar, skapa vit umstøður fyri broyting
Um Malene Freudendal-Pedersen
Malene Freudendal-Pedersen er professari í býarskipan á Aalborg Universitet, og hevur ein tvørfakliga bakgrund innan sosiologi, landafrøði, býarskipan og tøknissosiologi. Hennara gransking leggur dent á gerandis flytiførisvanar og hvussu teir hanga saman við planlegging og politikkum, og ávirkanina á burðardyggar býir og samfeløg.
Framløga v/Nina Koch-Ørvad
Ein pragmatisk tilgongd til burðadygd í byggiverkætlanum
- ‘Skjótt syftir burðardygdar-seiðir’, sum ikki koppa fíggjarætlanini
Um Nina Koch-Ørvad
Nina Koch-Ørvad er verkætlanarstjóri og arbeiðir við eini røð av menningar- og leiðbeiningarverkætlanum hjá Værdibyg, ið millum annað fevna um ta burðardyggu byggimannagongdina, virðisskapan av tí, sum verður rivið niður og gransking í mannagongdum innan bygging. Nina er útbúgvin sivilverkfrøðingur í bygningssniðgevan, og hevur eina ph.d í innovatiónsmannagongdum innan burðardygga bygging.
